جهاز جوجل Pixel 10 Pro كانت الشركة قدمته في أكتوبر اللي فات ومن المواصفات على الورق كالعادة مش ملفت للأنظار أوي وعلشان كده قررنا في DroidGate نجربه ونقول رأينا فيه ودي مراجعتنا الكاملة له وقبل ما نتكلم عن الجهاز خليني أديك الخلاصة السريعة:

معاك Pixel 8 أو Pixel 7 مش هتحتاج تحدث .. الجهاز مش الأفضل في الألعاب ولا البطارية ولا الكاميرا هي التوب طول الوقت .. لو عايز تسمتع بتجربة أداء سلسة وهي الأفضل في أي سمارت فون وعايز تجرب أجهزة بيكسل يبقى Pixel 10 هيكون خيار ممتاز وما تكلفش نفسك كتير وتشتري البرو

نبدأ بقى المراجعة الشاملة وأول حاجة نتكلم عنها هي المواصفات على الورق

المواصفات:

شاشة OLED قياسها 6.3 بوصة بريزليوشن 1280×2856 وتقنية LTPO اللي بتخلي معدل التحديث ما بين 1Hz و 120Hz علشان تاخد تجربة سلسة بدون التأثير بشكل كبير على البطارية وسطوع بيوصل لحد 3300nits وتقنية HDR10+

معالج Tensor G5 بدقة تصنيع 3 نانومتر

رامات 16 جيجا بايت ومساحة تخزين 128 أو 256 أو 512 جيجا بايت أو 1 تيرا بايت

شريحة التخزين من نوع UFS 3.1 لو المساحة 128 جيجا بايت والباقي UFS 4.0 ومش هتحس بفارق بينهم

بطارية 4870 ميلي أمبير ودعم الشحن السريع 30 وات والشحن اللاسلكي 15 وات

بصمة مدمجة مع الشاشة

3 كاميرات ورا 50 ميجا بيكسل بفتحة عدسة f/1.7 وتقنية OIS وللتقريب البصري 5x كاميرا 48 ميجا بيكسل بفتحة عدسة f/2.8 وتقنية OIS والكاميرا واسعة الزاوية 123 درجة و 48 ميجا بيكسل وبفتحة عدسة f/1.7

كاميرا أمامية 42 ميجا بيكسل بفتحة عدسة f/2.2

شغال بنظام Android 16

تحديثات أمنية وللنظام لمدة 7 سنين

سعر 1000 دولار

التصميم:

جهاز Pixel 10 Pro من حيث الشكل ما أختلفش كتير عن الإصدارات اللي فاتت وفي تحسينات بسيطة والجهة الخلفية مصنوعة من الأزاز مع إطار مصنوع من الألومنيوم والجهة الأمامية في الكاميرا عبارة عن “نقطة” فوق وربنا ما يعيد أيام النوتش بتاع Pixel 3 XL

ملمس جهاز Pixel 10 Pro ممتاز وبيحسسك فعلًا أنك ماسك جهاز بريميوم سعره يوصل لـ 1000 دولار والإطار اللي بيلمع فيه مدي الجهاز شكل مميز ولكن دايمًا دي بتكون حاجة بترجع للتفضيل الشخصي وكمان الإطار البارز للكاميرات من ورا كان مساعدني أني أمسك التليفون بشكل مريح والشريط بتاع الكاميرات ده بقى علامة مميزة في أجهزة بيكسل دلوقتي

بالنسبة لحجم الجهاز فهو 6.3 بوصة زي ما ذكرنا في المواصفات وعلى الرغم أنك هتشعر أنه حجمه كبير ولكن في نفس الوقت مش ضخم أوي والشخص اللي أيديه متوسطة مش هيعاني وهو ماسك التليفون

أزرار الباور والتحكم في الصوت ما أتغيرتش عن الإصدارات اللي فاتت ومازالت موجودة على الجهة اليمين وفوق بيكون زرار الباور وتحتيه زرار واحد فقط للتحكم في الصوت

بشكل عام تصميم الجهاز ممتاز سواء من حيث الحجم أو مواد التصنيع

الشاشة:

نيجي للشاشة اللي هي OLED وقياسها 6.3 بوصة وبتدعم تقنية HDR10+ وبتيجي بمعدل تحديث 120Hz والسطوع بتاعها بيوصل لحد 3300nits والريزليوشن بتاعها 1280×2856

وأنت بتبص على شاشات كتير في الشمس بيكون في معاناة شوية أنك تقدر تشوف الحاجة اللي ظاهرة بشكل واضح ولكن دي مش مشكلة مع شاشة Pixel 10 Pro لأن سطوعها ممتاز تحت إضاءة الشمس القوية وكل حاجة واضحة جدًا وده أمر متوقع من جهاز واصل سعره 1000 دولار

ولكن اللي مش مقبول في جهاز بالسعر ده هو أن شاشة الجهاز في الإضاءة المنخفضة مش بتنزل تلقائيًا لمستوى مريح للعين وهتضطر أنك تنزلها بشكل يدوي لمستوى تحس أنه مريح لعينيك

ألوان الجهاز ممتازة كعادة الشاشات الـ OLED في الأجهزة الرائدة وشاشة Pixel 10 Pro بتظهر الألوان بشكل أقرب للألوان الطبيعية وده من خلال وضعية adaptive اللي بتظبط الألوان بشكل تلقائي على حسب الإضاءة المحيطة بيك ولكن تقدر تغلي الخيار ده وتقدر كمان تخلي أن الألوان تبقى طبيعية أكتر من خلال اختيار خيار natural

طبعًا في شوية حاجات لازم تعملها أول ما تجيب الجهاز زي أنك تخلي معدل التحديث 120Hz بدل من 60Hz اللي هو الوضع الافتراضي وكمان تعدل الريزليوشن اللي بيكون HD وتخليه لأعلى ريزليوشن متوفر ولو هتستخدم طبقة حماية على الشاشة فعل ميزة زيادة الحساسية للضغط علشان ما يبقاش التاتش معاك تقيل

باختصار شاشة الجهاز ممتازة خصوصًا تحت إضاءة الشمس ولكن الإضاءة مش بتنزل تلقائي لوضع مريح للعين في الإضاءة المنخفضة وألوانها ممتازة

الأداء:

أجهزة بيكسل معروفة دايمًا أنها واحدة من أفضل أجهزة أندرويد من حيث الأداء إذا مكنتش الأفضل بفضل السلاسة بتاعتها وتحسين السوفت ير مع الهاردوير والأمر ما اختلفش في Pixel 10 Pro اللي هو واحد من أفضل الأجهزة المتوفرة حاليًا من حيث الأداء وقد يكون مش الأسرع في برامج الاختبارات المختلفة ولكن دايمًا اللي بيعبر عن الأداء هي التجربة الفعلية وفي تجربتنا للجهاز كان ممتاز وسلس

جهاز Pixel 10 Pro على الرغم من أداءه السلس والممتاز خلال الاستخدام اليومي ولكن دايمًا مش بيقدم أفضل أداء في الألعاب ولكن على الرغم من ده إلا أن تجربتنا مع لعبة Call of Duty كانت سلسة ومكنش فيها مشاكل إلا مع فتح اللعبة لأول مرة واللي حصل فيه دروب في الفريمات وهو أمر طبيعي لما بتيجي تفتح لعبة للمرة الأولى على أي جهاز حتى أجهزة الكمبيوتر لأن كأن الجهاز لسه بيتعرف عليها وعلى الملفات بتاعتها

بشكل عام أداء الجهاز ممتاز وسلس جدًا وفي الألعاب مش هو الأفضل ولكن مش هتواجه معاه أزمة في لعب الألعاب العالية ولو عايز جهاز متخصص في الألعاب يبقى Pixel 10 Pro مش هيكون موجه ليك

الكاميرا:

واحدة من أهم المميزات في أجهزة Pixel هي الكاميرا بتاعته ولكن الأجهزة ما بقيتش في الصدارة من حيث الكاميرا خلال السنتين تلاتة اللي فاتوا بسبب اعتماد جوجل بشكل كبير على تحسين المعالجة فقط وإهمال تحديث المستشعرات بمستشعرات حديثة وقوية تنافس بيها سامسونج وآبل

جهاز Pixel 10 Pro مازال واحد من أفضل الأجهزة من حيث الكاميرا ولكن مش في كل الأوقات هتاخد منه الصورة الأفضل زي ما كان في السنين اللي فاتت ومن تجربتنا كانت الألوان في الصور ممتازة وأقرب للطبيعة والتفاصيل كويسة جدًا ولكن في صور هتشوف أن ممكن يبقى في أفضل من كده وبالنسبة لتصوير الفيديوهات فهو كويس وهيقضي المطلوب ولكن برضه مش الأفضل وده أمر مش مقبول من جهاز بيتباع بسعر 1000 دولار

بالنسبة لميزة Super Res Zoom واللي بتتفعل تلقائي بعد التقريب 50x زي ما هتشوف في الأمثلة الي تحت بيحصل تشويه في ملامح الشخصيات وفي الكلمات المكتوبة على اليفط وده بسبب أن الميزة معتمدة على الذكاء الاصطناعي وعلى الرغم من قوة جوجل في المجال ده إلا أن الميزة مازالت مش بتقدم نتايج دقيقية بنسبة 100% خصوصًا في التعامل مع الوجوه والكلمات المكتوبة وأعتقد أنها هتتحسن في النقتطين دول إذا جوجل دمجت نموذج Nano Banana Pro مع الميزة

أه ميزة Super Res Zoom مبهرة ولكن مش مع وجوه الأشخاص والكلمات وفي الحالات دي شوفنا أن الاعتماد على تقريب 50x هو أفضل شئ لو عايز تقرب أوي ولكن أنك تبقى في حدود الـ 10x بالكتير ده هيقدم ليك أفضل نتيجة ومازالت جوجل مش هي الأفضل في نقطة الزووم والموضوع ده مش هيتحل فقط بالسوفت وير ولازم تقديم كاميرات تقريب قوية علشان تقدر تنافس في النقطة دي بشكل قوي

الخلاصة أن الكاميرات كويسة جدًا ولكن مش طول الوقت هتاخد الصورة الأفضل سواء في الإضاءة الكويسة أو المنخفضة ولو أنت مستخدم لجهاز Pixel 8 زي وجيت عملت أبجريد لـ Pixel 10 Pro مش هتحس بفارق كبير في جودة التصوير سواء صور أو فيديوهات ولكن لو أنت أول مرة تستخدم جهاز بيكسل في الغالب هتحس بفارق بفضل المعالجة المميزة اللي بتقدمها أجهزة بيكسل واللي ما بقيتش كفاية علشان تتربع أجهزة Pixel على عرش الأفضل في الكاميرات زي السابق

بعض الصور في الإضاءة المنخفضة مع Night Sight وبدون Night Sight ( دوس على الصور علشان تشوفهم كلهم وبجودتهم الكاملة):

بعض الصور مع التقريب البصري والتقريب 100x ( دوس على الصور علشان تشوفهم كلهم وبجودتهم الكاملة):

مزيد من الصور ( دوس على الصور علشان تشوفهم كلهم وبجودتهم الكاملة):

البطارية:

جهاز Pixel 10 Pro بيجي ببطارية 4870 ميلي أمبير زي ما ذكرنا في المواصفات والبطارية تقدر تكمل معاك يوم عمل بدون لعب يعني مع استخدام طبيعي وتشغيل يوتيوب معظم الوقت .. يعني يومي بدأ 6 الصبح والبطارية كانت 100% وعلى 5 العصر احتجت أني أشحنها مرة تانية ولكن مع الألعاب مش هتكمل معاك يوم عمل وهتحتاج تشحنها قبل 5 العصر وبالنسبة لسرعة الشحن اللي هي 30 وات فأنت في أقل من نص ساعة تقدر تشحن 50% من البطارية

بشكل عام بطارية Pixel 10 Pro مش أفضل حاجة ولكن مع استخدام طبيعي هتكمل معاك يوم عمل بدون مشاكل.

قارئ البصمة والصوت:

قارئ البصمة في Pixel 10 Pro من نوع Ultrasonic وهو سريع وممتاز ومعظم الوقت بيقرى بدون مشاكل ولكن مقارنةً بـ Pixel 8 فالسرعة ما اتحسنش بشكل ملحوظ وبالنسبة للصوت فأجهزة Pixel دايمًا بيكون صوتها مميز بفضل وجود سماعتين و Pixel 10 Pro بيقدم صوت نقي وكويس جدًا

النظام:

أجهزة Pixel معروفة دايمًا أنها مش بتقدم مميزات كتير ولكن بتكون معظم الأساسيات موجودة بجانب بعض المميزات المفيدة وجوجل معتمدة مؤخرًا على تقديم مميزات الذكاء الاصطناعي في أجهزتها و Pixel 10 Pro مدعوم بـ Gemini اللي بيخليك تفتح الكاميرا وتسأله عن أي حاجة ظاهرة قدامك وتقدر تعمل معاه شات لايف بالفيديو وكمان إمكانية تعديل الصور بشكل أسهل وأسرع من جوجل Google Photos عن طريق أنك تكتب Prompt بس ومن أهم المميزات اللي بيجي بيها الجهاز هي سنة مجانية في خطة AI Pro والاشتراك ده تكلفته حاليًا فوق الـ 7500 جنيه مصري

الجهاز شغال بنظام Android 16 مع واجهة Pixel وهيوصل له تحديثات لمدة 7 سنين سواء أمنية أو تحديثات إصدارات أندرويد

الخلاصة:

جهاز Pixel 10 Pro ممتاز ولكن مش موجه للي عايز يلعب كتير ولا اللي عايز أفضل بطارية في العالم ولو معاك جهاز زي Pixel 8 أو Pixel 7 فأنت مش محتاج تحدث ومش هتحس بالفارق الرهيب اللي يخليك تدفع 1000 دولار في الجهاز والحقيقة أن الجهاز ما يستحقش السعر ده يعني كان هيبقى مناسب أكتر لو سعره 700 لـ 800 دولار وعلى الرغم من كده إلا أن الجهاز هيقدم ليك أفضل تجربة أداء موجودة حاليًا بفضل التحسين الممتاز لنظام أندرويد بشكل عام وتحسين جوجل للنظام مع الهاردوير بتاعها

لو أنت راجل عايز يجرب أجهزة بيكسل ويستمتع بتجربة الأداء المميزة والسلاسة بتاعته يبقى ما تكلفش نفسك كتير أوي و Pixel 10 هيكون كافي ليك