موقع 9to5Google نشر تقرير جديد من خلال تحليل الأكواد المخفية في التحديثات التجريبية (Android 17 Beta 4 و Android Canary)، واللي كشفت عن استعداد جوجل لإطلاق لابتوب “بيكسل” جديد، وميزة هاردوير جديدة كلياً اسمها “Pixel Glow” هتنزل للموبايلات واللابتوبات.

إيه هي ميزة Pixel Glow؟
جوجل ناوية تخلي ضهر أجهزتها ينطق! الميزة دي عبارة عن “إضاءة وألوان هادية” بتشتغل على ضهر الجهاز عشان تنبهك بحاجات معينة لو الموبايل مقلوب على شاشته. من أبرز استخداماتها:

التنبيهات المهمة: الجهاز هينور بألوان هادية لو حد من جهات الاتصال المفضلة عندك (Favorites) بيتصل بيك، عشان تفضل مركز في اللي بتعمله من غير ما تفقد الاتصال بالناس المهمة.

التفاعل مع Gemini: الإضاءة هتشتغل وتتفاعل معاك وأنت بتتكلم أو بتدي أوامر صوتية للمساعد الذكي “Gemini”، عشان تديك تأكيد بصري (Visual feedback) إن الأوامر بتتنفس من غير ما تلمس الجهاز.

عودة عائلة اللابتوبات من جوجل (Pixel Laptop) :
الأكواد اللي ظهرت كان فيها أيقونة صريحة للابتوب (ic_laptop_light)، وده بيؤكد إن ميزة Pixel Glow هتكون موجودة في لابتوب جديد من جوجل. الخطوة دي مش مفاجأة خصوصاً مع تطوير جوجل الأخير لنسخة “الأندرويد المخصصة لأجهزة الديسكتوب”، وبتفكرنا بأجهزة (Chromebook Pixel) القديمة اللي كان فيها شريط إضاءة عشان تعرف منه نسبة البطارية.

بالنسبة للموبايلات، متوقع نشوف الميزة دي في سلسلة Pixel 11 الجاية، رغم إن التسريبات الأولية لشكل الجهاز مبينتش مكان واضح للإضاءة دي (ممكن تكون مدمجة في شريط الكاميرا البارز أو حتى في لوجو حرف G).