لو كنت بتحوش عشان تشتري موبايل سامسونج الخرافي القابل للطي مرتين (Galaxy Z TriFold)، فالتقرير الأخير من موقع Mashable جايب لك خبر مش لطيف: الموبايل ده غالباً مش هتشوفه بيتباع تاني أبداً!
سامسونج حدثت موقعها الرسمي وغيرت حالة هاتفها العملاق لـ “مُباع بالكامل” (Completely Sold Out). والمفاجأة إنها لأول مرة بتستخدم كلمة “إصدار محدود” (Limited run) في وصف الجهاز، وده بيدي إشارة واضحة إن الموبايل ده كان تجربة مش هتتكرر في المستقبل القريب.
الموقع الرسمي لسامسونج دلوقتي بيوجه أي حد بيدخل يدور على الـ TriFold إنه يشتري بداله (Galaxy S26 Ultra) أو (Galaxy Z Fold 7).
الموبايل اللي أثار ضجة كبيرة في بدايات السنة دي بسبب تصميمه وسعره الخيالي (حوالي 2900 دولار) كان نزل منه دفعات قليلة، وآخر “ريستوك” ليه كان في بداية شهر أبريل الحالي في أمريكا وخلص في دقائق.
التقرير بيطرح احتمالين: يا إما دي كانت خطة سامسونج من البداية إن الجهاز ده يكون حصري جداً كنوع من استعراض العضلات التكنولوجية، أو إن الشركة أدركت إن الاستمرار في تصنيع موبايل بالتعقيد ده في ظل “أزمة نقص الذواكر العالمية” (Memory Shortage) الحالية هو شيء غير مستدام ومكلف جداً.
تجربة الـ TriFold كانت استثنائية، بس يبدو إن سامسونج قررت تقفل الصفحة دي. اللي لحق اشترى الموبايل ده دلوقتي معاه “قطعة نادرة”، واللي ملحقش.. غالباً مفيش فرصة تانية!
