تقرير جديد ومثير جداً من موقع 9to5Mac كشف السر ورا التسريبات الغريبة اللي بتقول إن آبل ناوية تنزل نسخة جديدة من سماعات AirPods Pro 3 مزودة بكاميرات أشعة تحت حمراء (IR Cameras). القصة مش مجرد كاميرات، دي تكنولوجيا خيال علمي هتحول السماعة لجهاز بيقرأ أفكارك أو بمعنى أصح.. بيقرأ حركات وشك!
في بداية السنة دي، آبل اشترت شركة ناشئة سرية اسمها (Q.ai) في تاني أكبر صفقة استحواذ في تاريخها. الشركة دي متخصصة في حاجة واحدة بس: “تحليل حركات الوجه الدقيقة” (Micro-movements) عشان تعرف إنت بتقول إيه من غير ما تتكلم بصوت مسموع أصلاً!
سر كاميرات الـ IR: بقالنا فترة بنسمع عن كاميرات في الآيربودز، والناس كانت مستغربة (هنصور بوداننا؟!). التقرير بيأكد إن الكاميرات دي مش للتصوير، دي هتبقى موجهة ناحية وشك عشان تلقط الحركات الدقيقة للفك وعضلات الوجه.
ميزة الكلام الصامت (Silent Speech): لما ندمج كاميرات الـ IR مع الحساسات اللي موجودة أصلاً في السماعة (زي مستشعر نبضات القلب والـ Accelerometer) مع تكنولوجيا شركة Q.ai.. النتيجة هتكون إنك هتقدر تدي أوامر لـ Siri وتتكلم مع أجهزتك بمجرد إنك “تحرك شفايفك” من غير ما تطلع أي صوت!
تخيل السيناريو: إنت قاعد في اجتماع، أو في مكان زحمة ودوشة، ومحتاج تدي أمر لموبايلك أو تبعت رسالة.. كل اللي هتعمله إنك هتحرك شفايفك بالكلام، والسماعة هتفهمك وتنفذ فوراً في صمت تام.
التسريبات الحالية بتشير إن النسخة المتطورة دي من (AirPods Pro 3) المزودة بكاميرات الـ IR ممكن تنزل الأسواق على أواخر السنة دي (2026). وكمان متوقع إن التكنولوجيا دي تتدمج بعدين في “نظارات آبل الذكية” اللي شغالين عليها.
