شركة “ميتا” اعلنت عن حزمة أدوات جديدة بتشتغل بـ “الذكاء الاصطناعي” عشان تصطاد النصابين قبل ما يوصلولك، وكمان وجهت ضربة أمنية كبيرة لشبكات النصب العالمية.
في حساب الفيسبوك هيبدأ يظهرلك “تحذير” صريح لو جالك طلب صداقة من حد مشبوه. يعني لو الأكونت لسه معمول جديد، أو مفيش بينكم أصدقاء مشتركين، أو كاتب إنه من بلد وموجود في بلد تانية.. فيسبوك هينبهك فوراً ويقولك “خلي بالك الأكونت ده مش امان” قبل ما تقبل الإضافة.
اما في واتساب حركات النصب الجديدة إنهم يبعتولك QR Code مزيف (بحجة مسابقة أو تصويت) ولما تعمله سكان يربطوا الواتساب بتاعك بجهازهم ويسرقوه! عشان كده ميتا عملت نظام تنبيه هيطلعلك رسالة تحذير توقف محاولات “ربط الأجهزة” الغريبة، وهتقولك الطلب ده جاي منين بالظبط عشان تفكر مرتين قبل ما تدوس موافق.
ميتا كبرت ميزة “كشف النصب” بالذكاء الاصطناعي. لو حد غريب دخل يكلمك وبعتلك رسايل فيها أسلوب نصب معروف (زي عروض الشغل الوهمية من البيت أو استثمارات مضروبة)، الأبلكيشن هيحذرك. وكمان هيديك أوبشن إنك تخلي الذكاء الاصطناعي يراجع الشات ويأكدلك لو ده نصاب عشان تعمله بلوك ريبورت وأنت مطمن.
الموضوع مش بس تحديثات للبرامج؛ ميتا أعلنت إنها بالتعاون مع جهات شرطة دولية قدروا يقفلوا أكتر من 150 ألف حساب تابعين لشبكات نصب إلكتروني ضخمة في جنوب شرق آسيا، وكمان تم القبض على 21 شخص من العصابات دي.
