اكدت بعض التقارير إن مايكروسوفت اخدت قرار نهائي لا رجعة فيه بخصوص جهازها الجاي “Xbox Helix”. الخلاصة؟ “مفيش حصريات تاني خالص!”
المُسرب المعروف (SneakersSO) أكد إن مايكروسوفت مش هترجع لنظام الحصريات تاني أبداً. كل ألعابها الكبيرة (زي Halo و Gears و Fable) هتنزل على أجهزة تانية، وعلى رأسهم طبعاً الغريم التقليدي بلايستيشن 5 وبلايستيشن 6!
التسريبات بتقول إن جهاز “Xbox Helix” مش هيكون كونسول تقليدي للجمهور العادي، لأ، ده أقرب لـ “جهاز بي سي (PC) مصغر” متقفل في علبة كونسول.
عشان هو جهاز بمواصفات PC، التسريبات بتقول إن سعره ممكن يوصل لـ 1200 دولار (أيوة زي ما قريت!). وده رقم ضخم جداً مقارنة بالـ PS6 اللي متوقع ينزل بسعر أرخص بكتير.
ليه مايكروسوفت بتعمل كده؟ رئيسة إكس بوكس عديمة الخبرة في مجال الالعاب “آشا شارما” بتحاول تلم الدنيا، بس الحقيقة إن مبيعات أجهزة (Series X|S) كانت محبطة جداً مقارنة باكتساح الـ PS5 (اللي متوقع يعدي 100 مليون نسخة). فـ مايكروسوفت لقت إن مكسبها الحقيقي في بيع ألعابها على كل المنصات بدل ما تربطها بجهاز واحد سعره غالي ومش هيبيع كتير.
سوني ماشية في سكة “حصريات قوية للجهاز بتاعنا وبس”، ومايكروسوفت اصبحت شركة ألعاب بننزل ألعابها في كل حتة وجهازها الجاي للناس الغاوية PC بس مش عايزة توجع دماغها بالتجميع”.
